28 лістапада намеснік міністра замежных спраў КНР Лэ Юйчэн выклікаў амерыканскага амбасадара ў Пекіне Тэры Бранстэда, зрабіў сур'ёзнае прадстаўленне і выказаў рэзкі пратэст у сувязі з падпісаннем прэзідэнтам ЗША Дональдам Трампам т.зв. «Законапраекта аб правах чалавека і дэмакратыі ў Сянгане 2019» (Hong Kong Human Rights and Democracy Act of 2019).

Лэ Юйчэн паказаў, што прыняцце амерыканскім бокам т. зв. "Законапраекта аб правах чалавека і дэмакратыі ў Сянгане 2019" разглядаецца як сур'ёзнае ўмяшанне ў справы Сянгана і ва ўнутраную палітыку Кітая, а таксама як грубае парушэнне міжнароднага права і асноватворных прынцыпаў міжнародных адносін. Гэты непрыхаваны гегеманісцкі ўчынак выклікаў глыбокае абурэнне і рашучы пратэст у кітайскага ўрада і народа.

Намеснік кіраўніка МЗС КНР заявіў, што Сянган з'яўляецца неад'емнай часткай Кітая. Усё, што, так ці інакш, звязана з Сянганам -- гэта выключна ўнутраныя справы КНР. Краіна ні ў якім выпадку не дапусціць вонкавага ўмяшання іншых дзяржаў і сіл у любых яго відах і праявах. Рашучасць кітайскага ўрада бараніць нацыянальны суверэнітэт, бяспеку і інтарэсы развіцця, а таксама прыхільнасць курсу «Адна дзяржава, два лады» непахісныя, як і непахісная рашучасць супрацьстаяць умяшанню любых знешніх сіл у справы Сянгана.

Лэ Юйчэн падкрэсліў, што Кітай заклікаў ЗША выправіць зробленыя памылкі, кардынальна змяніць рашэнне аб прыняцці законапраекта і неадкладна спыніць умяшанне ў справы Сянгана і ўнутраную палітыку Кітая, каб названыя негатыўныя дзеянні не нанеслі істотнай шкоды кітайска-амерыканскім адносінам і супрацоўніцтву бакоў у ключавых сферах, якія ўяўляюць узаемную цікавасць. Кітайскі бок мае намер працягваць цвёрда выступаць катэгарычна супраць памылковых рашэнняў ЗША. Пры гэтым за наступствы сваіх памылак павінны несці адказнасць самі Злучаныя Штаты.