Кітай прыпыніў запланаванае на 15 снежня ўвядзенне дадатковых тарыфаў на шэраг тавараў з ЗША. Пра гэта паведаміў Камітэт па мытных пошлінах КНР.
Прыпыненне ўключае ў сябе дадатковыя 10-працэнтныя і 5-працэнтныя тарыфы на амерыканскія тавары. Апроч таго, Кітай працягне прыпыняць дадатковыя пошліны на аўтамабілі і камплектуючыя амерыканскай вытворчасці, гаворыцца ў паведамленні.
Навіны паступілі пасля таго, як у пятніцу 13 снежня ЗША і КНР узгаднілі тэкст першага этапу гандлёвага пагаднення. Гэты дакумент, у прыватнасці, прадугледжвае, што ЗША пачнуць паступовае скарачэнне і адмену імпартных тарыфаў на тавары з Кітая. Кітай, у сваю чаргу, пагадзіўся нарошчваць аб'ёмы імпарту са Злучаных Штатаў, пераважна сельскагаспадарчай прадукцыі.
У тэксце пагаднення замацаваны дамоўленасці па такіх напрамках, як абарона правоў інтэлектуальнай уласнасці, фінансавы сектар, пашырэнне доступу да рынкаў, стварэнне механізму ўрэгулявання спрэчак. - Р -