Кіраўнік прэс-службы прэзідэнта Турцыі Фахрэцін Алтун 1 сакавіка заявіў аб тым, што з канца лютага больш за 80 тысяч нелегальных мігрантаў праніклі ў Еўропу праз мяжу на паўночным захадзе Турцыі. У бліжэйшыя дні гэтая лічба можа яшчэ павялічыцца.
Ф. Алтун падкрэсліў, што сірыйскі гуманітарны крызіс, беспрэцэдэнтны паток бежанцаў і нелегальная міграцыя - гэта праблемы не толькі Турцыі, але і гэтага рэгіёну, Еўропы і ўсяго свету.
Па словах Ф. Алтуна, турэцкі бок адкрыты да "сур'ёзнага і надзейнага" супрацоўніцтва, Турцыя як след зробіць сваю справу, але неабходна, каб і іншыя краіны ў гэтым пытанні зрабілі ўсё магчымае.
Як паведамляецца, мноства нелегальных мігрантаў спрабуюць пранікнуць у Еўропу з правінцыі Эдырне на паўночным захадзе Турцыі. Пасля таго як на мінулым тыдні турэцкі бок абвясціў, што больш не будзе перашкаджаць сірыйскім бежанцам адпраўляцца ў Еўропу, за два апошнія дні многія нелегальныя мігранты пераправіліся на рыбацкіх і надзіманых лодках праз памежную раку Эўрос у Грэцыю.
Увечары 27 лютага ў сірыйскай правінцыі Ідліб турэцкія вайскоўцы падвергліся паветранай атацы сірыйскіх урадавых войскаў, у выніку 36 турэцкіх ваенных загінулі, некалькі дзесяткаў чалавек атрымалі раненні. Пасля гэтага ўрад Турцыі заявіў, што больш не будзе перашкаджаць пранікненню сірыйскіх бежанцаў у Еўропу.
Турэцкія афіцыйныя асобы сцвярджаюць, што да цяперашняга моманту Турцыя прыняла каля 3,7 млн бежанцаў з Сірыі. Прэзідэнт Турцыі Рэджэп Таіп Эрдаган у апошні час неаднаразова заяўляў, што яго краіна больш не можа вырашаць праблему сірыйскіх бежанцаў у адзіночку. --0--