Цягнік CR450 – найноўшая мадэль кітайскіх высакахуткасных цягнікоў – будзе здольны развіваць хуткасць 400 км/г. Аб гэтым паведамілі ў Кітайскай дзяржаўнай чыгуначнай карпарацыі /КДЧК/, якая з'яўляецца аператарам чыгунак краіны.

Паводле інфармацыі КДЧК, новая мадэль будзе значна хутчэйшая за высакахуткасныя цягнікі CR400 "Фусін", якія разганяюцца да 350 км/г. У параўнанні з "Фусінам" CR450 на 12 працэнтаў лягчэйшы, спажывае на 20 працэнтаў менш энергіі і вылучаецца палепшанымі на 20 працэнтаў тармазнымі характарыстыкамі.

Інавацыйны праект CR450 таксама прадугледжвае тэхналагічныя інавацыі ў інфраструктуры, уключаючы рэйкі, масты і тунэлі, гаворыцца ў паведамленні карпарацыі.

Кітай пабудаваў найбуйнейшую ў свеце сетку высакахуткасных чыгунак, імкнучыся задаволіць попыт насельніцтва на зручныя і камфартабельныя паездкі. Яе агульная эксплуатацыйная працягласць перавышае 45 тыс. км, маршруты высакахуткасных цягнікоў "Фусін" праходзяць праз 31 рэгіён правінцыйнага ўзроўню.