Напярэдадні Ражаства ўся Германія ператвараецца ў казачную краіну, упрыгожаную агеньчыкамі і ласункамі. Міндальнае і імбірнае печыва, цукеркі і пячоныя яблыкі пад карамеллю, усе гатункі штрудзеляў і духмяны глінтвейн—гэтыя пахі адчувальныя на вуліцах, падчас карнавалаў, на калядных кірмашах і ў шматлікіх барах.

Калядныя кірмашы – гэта асаблівая германская пацеха. Яны праходзяць амаль што ва ўсіх гарадах і вёсках. На гандлёвых радах мясцовыя жыхары і турысты купляюць усё для гатавання святочных страў, ёлачныя цацкі і традыцыйныя сувеніры. На кірмашовых плошчах абавязкова гучыць музыка, круцяцца каруселі, іграюцца калядныя спектаклі і канцэрты.