Афіцыйны прадстаўнік МЗС КНР Хуа Чуньін звярнула асаблівую ўвагу на значэнне Кітайска-індыйскага пагаднення па памежным супрацоўніцтве, якое падпісана падчас візіту прэм'ер-міністра Індыі Манмахан Сінгха ў Кітай. Падпісанне дакумента ўмацуе ўзаемадавер і сяброўства, будзе захоўваць мір і стабільнасць у памежных раёнах, заявіла чыноўнік кітайскага МЗС.

Змест новага пагаднення грунтуецца на папярэдніх падобных дакументах ад 1993, 1996 і 2005 гг. Дакумент заканадаўча замацоўвае "станоўчую практыку і вопыт" апошніх дзесяцігоддзяў, адзначыла Хуа Чуньін.

Паводле яе слоў, на працягу апошніх дзесяцігоддзяў захоўваліся спрыяльныя тэндэнцыі ў перамовах па пагранічных пытаннях, і сітуацыя на мяжы ў цэлым была мірнай і спакойнай. Бакам удалося эфектыўна трымаць пад кантролем рознагалоссі і захоўваць тэндэнцыю сумеснага развіцця, падкрэсліла Хуа Чуньін.

Новае пагадненне пацвярджае адмову абедзвюх краін ад выкарыстання сваіх ваенных магчымасцяў адна супраць другой, абавязвае абодва бакі працягваць намаганні па захаванні міру і стабільнасці ў памежных раёнах, прылеглых да лініі фактычнага кантролю, дадала прадстаўнік знешнепалітычнага ведамства.

Спыніўшыся на іншым двухбаковым дакуменце – Мемарандуме аб узаемаразуменні па супрацоўніцтве ў пытанні трансгранічных рэк, Хуа Чуньін сказала, што зацікаўленыя структуры Кітая будуць выконваць гэта пагадненне, актывізуючы абмены і супрацоўніцтва з індыйскімі партнёрамі.

У адпаведнасці з Мемарандумам аб узаемаразуменні Кітай і Індыя маюць намер ажыццяўляць супрацоўніцтва па прадастаўленні гідралагічнай інфармацыі ў сезон паводак, сумесна рэагаваць на надзвычайныя сітуацыі і супрацоўнічаць па іншых напрамках, якія маюць агульныя інтарэсы. - Р -