Старшыня КНР Сі Цзіньпін у чацвер правёў сустрэчу з дзяржсакратаром ЗША Джонам Кэры і міністрам фінансаў ЗША Джэйкабам Льюсам, якія прыбылі ў Пекін для ўдзелу ў 6-м раўндзе кітайска-амерыканскага стратэгічнага і эканамічнага дыялогу і 5-м раўндзе кітайска-амерыканскіх кансультацый па гуманітарных абменах на высокім узроўні.
Сі Цзіньпін на сустрэчы адзначыў, што праз дыялог і кансультацыі бакі дамагліся пазітыўных вынікаў і заявілі аб жаданні паляпшаць і развіваць кітайска-амерыканскія адносіны.
Сі Цзіньпін заклікаў ажыццявіць дасягнутыя дамоўленасці, падкрэсліўшы, што бакі, па-першае, павінны актывізаваць кантакты і абмены. "Я вітаю і разлічваю на ўдзел прэзідэнта ЗША Барака Абамы ў неафіцыйнай сустрэчы кіраўнікоў АЦЭС, якая адбудзецца ў лістападзе гэтага года ў Пекіне", - адзначыў Сі Цзіньпін.
Па-другое, як сказаў Сі Цзіньпін, варта развіваць супрацоўніцтва. Кітай і ЗША павінны паскорыць перамовы па інвестыцыйнай дамове, умацаваць сувязі між узброенымі сіламі дзвюх краін, імкнуцца да дасягнення дамоўленасцей і пагадненняў па супрацоўніцтве ў пытанні зменаў клімату і зялёнага развіцця, падтрымліваць кантакты і каардынацыю па вострых рэгіянальных праблемах, адстойваць мір і стабільнасць на Карэйскім паўвостраве .
Па-трэцяе, бакі павінны паменшыць колькасць непрыемнасцяў і прыкласці намаганні да пошуку агульнага пры захаванні разыходжанняў, заявіў Сі Цзіньпін.
Ён таксама заклікаў працягнуць будаваць адносіны новага тыпу паміж буйнымі дзяржавамі, якія абапіраліся б на прынцыпы ўзаемнай павагі, супрацоўніцтва і ўзаемнай выгады. Старшыня КНР таксама перасцярог ад канфліктаў і канфрантацыі.
Джон Кэры і Джейкоб Льюс адзначылі, што за два дні амерыканскі бок правёў з кітайскімі калегамі паспяховы дыялог і кансультацыі. Госці з ЗША дадалі, што Б. Абама вітае і спадзяецца бачыць магутны, квітнеючы і стабільны Кітай.
Па іх словах, амерыканскі бок падтрымлівае імкненне Кітая да ўсебаковага паглыблення рэформаў і гатовы ўмацаваць супрацоўніцтва з Кітаем з тым, каб прасоўваць агульныя інтарэсы дзвюх краін, забяспечыць бяспеку, стабільнасць, росквіт усяго свету. -0 -