Кітайскія ўлады маюць намер у зонах рызыкі ўдасканаліць механізм ранняга папярэджання аб стыхіі і стварыць сетку сейсмалагічных станцый.

Як стала вядома на Усекітайскай нарадзе начальнікаў сейсмалагічных упраўленняў, на зацвярджэнне ў Дзяржаўны камітэт КНР па справах развіцця і рэформ ужо прадстаўлена рэкамендацыя аб рэалізацыі праекта хуткага апавяшчэння аб сіле падземных штуршкоў і ранняга папярэджання пра іх.

Праект павінен быць рэалізаваны на працягу пяці гадоў пасля зацвярджэння. Змены закрануць сталічны рэгіён, сейсманебяспечную паласу, што перасякае краіну з поўначы на поўдзень, паўночна-заходнюю частку Сіньцзяна і прыморскую паўднёва-ўсходнюю частку краіны.

У апошнія гады ў Кітаі атрымала практычнае прымяненне тэхналогія ранняга папярэджання аб падземных штуршках. Так, уздоўж пракладзеных высакахуткасных чыгуначных магістраляў утаноўлены сейсмалагічныя станцыі і сістэмы ранняга папярэджання. Гэта дазваляе машыністам пры ўзнікненні землетрасення запаволіць рух цягніка і спыніцца. - Р -