Мінск – добрае месца для правядзення перамоў па паглыбленні інтэграцыі дзяржаў на постсавецкай прасторы, заявіў у аўторак прэзідэнт Беларусі Аляксандр Лукашэнка на сустрэчы са старшынёй Выканкама СНД Сяргеем Лебедзевым. Пра гэта паведамілі ў прэс-службе беларускага лідара.

Паводле слоў А.Лукашэнкі, беларуская сталіца можа стаць пляцоўкай для дыялогу і інтэграцыі, прычым не толькі постсавецкіх рэспублік. Праз некалькі дзён у Мінску адбудзецца пасяджэнне Вышэйшага Еўразійскага эканамічнага савета, а таксама саміт кіраўнікоў дзяржаў СНД. Пазней беларуская сталіца збярэ міністраў замежных спраў краін Садружнасці. У сувязі з гэтым С.Лебедзеў адзначыў высокую ступень гатоўнасці беларускага боку да правядзення буйных самітаў і распавёў, што ў парадак дня будзе вынесена 14 пытанняў, якія ахопліваюць усю дзейнасць СНД: ад гуманітарнай да эканамічнай. - Р -