Дамова аб Еўразійскім эканамічным саюзе павінна быць падрыхтавана ў вызначаны тэрмін. Пра гэта заявіў прэзідэнт Беларусі Аляксандр Лукашэнка на сустрэчы з членамі Савета Еўразійскай эканамічнай камісіі і старшынёй Калегіі ЕЭК.

У снежні прэзідэнты Беларусі, Расіі і Казахстана ўхвалілі інстытуцыйную частку дакумента і дамовіліся, што цалкам дамова да падпісання павінна быць гатова да першага мая. У поўнамаштабным фармаце Еўразійскі эканамічны саюз пачне працаваць ужо са студзеня 2015 года.

А.Лукашэнка адзначыў важнасць еўразійскай інтэграцыі і зацікаўленасць Беларусі ў падрыхтоўцы якаснага праекта Дамовы. У першую чаргу стаіць задача забяспечыць унутры будучага Саюза рэжым свабоднага гандлю без выключэнняў і абмежаванняў. Еўразійскай камісіі даручана правесці іх інвентарызацыю і прапанаваць меры і тэрміны па іх адмене. - Р -