Рукапісы

На рубяжы 20 стагоддзя ў адной з пячор знайшлі велізарны скарб рукапісаў, прыкладна 20 тыс. паасобнікаў. Відаць, іх прыносілі сюды ў 11 стагоддзі, калі манускрыпты пачалі выцясняцца з ужытку друкаванымі кнігамі. Рукапісны фонд Магаа досыць разнастайны па змесце – гэта слоўнікі, будыйскія, даоскія, нестарыянскія і маніхейскія рэлігійныя тэксты, трактаты па філасофіі, матэматыцы, медыцыне, астраноміі, гісторыі і геаграфіі, запісы традыцыйнага фальклору і класічнай кітайскай паэзіі, афіцыйныя дакументы. Сярод рукапісных помнікаў Магаа – «Кніга варажэнняў», унікальны тэкст, напісаны цюркскім рунічным пісьмом не на камні, а на паперы. Спектр моў вывучаных манускрыптаў таксама вельмі разнастайны – гэта класічная і размоўная (байхуа) кітайская, тыбецкая, тангуцкая, хатанская, сагдыйская, тахарская, а таксама санскрыт і палі.