"Шак'ямуні, які спускаецца з гары". Вертыкальны скрутак, туш і фарбы па шоўку, 117,6 х 51,9 см. Токіа, Нацыянальны музей.

Для пачатку разгледзім карціну «Шак'ямуні, які спускаецца з гары» (释迦出山图). Гэты скрутак належыць да аднаго з найлепшых твораў Лян Кая з пункту гледжання яго мастацкай кампазіцыі. Апрача мастацкай характарыстыкі твора цікавы і яго канцэптуальны бок. Шак'ямуні ў пошуках прасвятлення адправіўся ў горы, каб там увесці сябе ў суровы аскетызм. Пасля 6 гадоў блуканняў на мяжы са смерцю, ён зразумеў, што суровыя аскетычныя выпрабаванні толькі мардуюць цела і засланяюць розум. Менавіта ў такім стане адлюстроўвае Лян Кай прарока; сусветны сум і роздум пра дасягненне прасвятлення не могуць пакінуць Шак'ямуні, які стаяў ля скалы. Асіметрыя, створаная Лян Каем вакол фігуры Шак'ямуні, наводзіць на роздум, што прарок ужо амаль дасягнуў сваёй кропкі раўнавагі, але вецер і холад адкідаюць яго ў бок.