Вярхоўная Рада Украіны прызнала Расію краінай-агрэсарам. Заяву падтрымаў 271 дэпутат пры неабходным мінімуме ў 226 галасоў. Тэкст гэтага дакумента на афіцыйным сайце ўкраінскага парламента пакуль адсутнічае, аднак падчас пленарнага пасяджэння яго зачытала старшыня Камітэта па замежных справах Ганна Гапко. У заяве сказана, што Вярхоўная Рада "прызнае Расійскую Федэрацыю краінай-агрэсарам" і просіць пайсці на аналагічны крок ААН, Еўрапарламент, ПАСЕ, НАТА, а таксама ўрады розных краін. Пры гэтым аказваць ціск на Маскву, на думку ўкраінскага парламента, варта шляхам увядзення новых санкцый.
Намеснік міністра замежных спраў РФ Рыгор Карасін у сваю чаргу заявіў, што заява Вярхоўнай Рады Украіны аб прызнанні Расіі краінай-агрэсарам зроблена з мэтай блакіраваць пошук кампрамісу адносна ўкраінскай праблемы.
"Гэта, вядома, бяздумная і безадказная заява, якая, мабыць, накіравана на тое, каб блакіраваць шляхі да пошуку кампрамісу, які так неабходны зараз Украіне", – заявіў ён агенцтву "Інтэрфакс".
Р.Карасін паведаміў, што МЗС РФ рыхтуе афіцыйную заяву ў сувязі з рашэннем парламента Украіны. - Р -